On bir ayın sultanı
RAMAZAN

Hər keçən saniyə həyatdan axıb gedir və insanlar yaşadıqları saleh günlərin dəyərli xatirələri ilə təsəlli tapır. Bu hal insana gələcəkdə təsəlli olacaq yeni saleh günlər yaşamalı olduğunu xatırladır. Budur, dua və Allaha yönəlmə mövsümü olan Ramazan ayı da indiyə qədər yaşanan saleh günləri andıran canlı bir mənbə kimi dəyərləndirilməyi ­gözləyir. Ramazan orucu, Qədr gecəsini, təravihi, Quranı, ibadəti, qulluğu və bayramı özündə ehtiva edən bərəkətli bir aydır. Ramazan nə qədər ibadət edilir-edilsin, həqiqi qurtuluşun ancaq Allahın mərhəməti ilə əldə ediləcəyini bizə yenidən xatırladır. Bir çox əvf və qurtuluş yollarını özündə toplayan bu ay Quranı anlamağı, onu oxuyarkən ağlaya bilməyi, bütün əzalara oruc tutdurmağı, hər gecəni Qədr gecəsi bilməyi, namaz və ­dua­nın insana rahatlıq bəxş etdiyini, həqiqi bayramın ancaq Allaha qulluq nəticəsində əldə ediləcəyini öyrədir. Gecə-gündüz nemət və fürsətlərlə dolu bu ay insanlarla olan münasibətlərin əslində göründüyündən daha fərqli olduğundan, hadisələrin insan ruhuna pıçıldadığı məna dolu ehtişamdan xəbər verir. Eyni zamanda Allaha yaxın olmaq üçün atılan addımların insan ruhunda daha dərindən hiss edildiyi bu bərəkətli ay, sanki qurumağa üz tutmuş könüllərə su səpir və insanı daxili aləmində yeni bir dirilişə hazırlayır… Bu kitabda, Ramazan ayının gətirdiyi maddi-mənəvi bərəkət qaynaqlarından bəhs edildi. Bu ayın Allahdan gələn mükafatlarla həyatımızda nə kimi dəyişikliklərə səbəb olduğu hiss etdirilməyə çalışıldı. Allah-Təalanın və Peyğəmbərimizin (s.ə.s) zikr etdiyi oruc, orucun hikmətləri, Ramazanın xatirələrdəki yeri, sahur vaxtının mənəvi zənginliyi və bərəkəti, ruhlarımızın qidası təravih namazları və varlı ilə yoxsul arasında qurulan körpülər, yəni zəkat və sədəqə kimi ibadətlərdən bəhs edildi. İftar süfrələrimizin qonaq-qaralı olmasının əhəmiyyəti və iftar anlarının gözəllikləri xatırladıldı. Peyğəmbərimizin (s.ə.s) və Onun sadiq tələbələri olan Haqq dostlarının Ramazan günlərini necə keçirdikləri, onları görən bəxtəvər insanların müşahidələlərindən səhifələrə köçürüldü. Allahım! Əfvini və  rizanı istəyirik. Ya Rəbbi! Bizə sənin razı olacağın  işlər görməyi nəsib et!